CANTOS NA MARÉ 2011

Carlos do Carmo, Mayra Andrade, Socorro Lira e Xoán Curiel, protagonistas dun novo Cantos na Maré en xaneiro

• O Pazo da Cultura de Pontevedra celebra o 14 de xaneiro ás 21:00h a novena edición do máis importante festival internacional da lusofonía.

• Compartirán escenario figuras consagradas e talentos emerxentes das músicas do mundo, nunha noite na que soarán fado, morna, música popular brasileira e canción de autor galega.

• Cantos na Maré e unha produción de Nordesía co patrocinio do Concello de Pontevedra e a colaboración de Agadic e Novacaixagalicia

PONTEVEDRA, 20 DE DECEMBRO DE 2011.- Xuntar no escenario algunhas das voces máis interesantes das músicas de lingua galega e portuguesa. Ese é un dos principais atractivos de Cantos na Maré, o festival internacional da lusofonía que o sábado 14 de xaneiro ás 21:00h volve ao Pazo da Cultura de Pontevedra para celebrar a súa novena edición, de novo coa dirección artística de Uxía.

Carlos do Carmo, historia viva do fado con case 50 anos de carreira, e Mayra Andrade, chamada a ser a sucesora de Cesária Évora na difusión internacional da música de Cabo Verde, son dúas das principais referencias desta edición. Xunto a eles estarán a brasileira Socorro Lira, coa súa reinterpretación do legado musical atlántico, e Xoán Curiel, cantautor pop galego libre de prexuízos.

O espectáculo virá, coma sempre, precedido de varios días de ensaios para que os convidados se coñezan e constrúan xuntos un repertorio orixinal que fai de Cantos na Maré un espectáculo único. Contará coa dirección musical de Paulo Borges (Azores-Portugal), que tocará o piano e estará á fronte dunha banda que completan José Manuel Díaz (Cuba, contrabaixo), Quiné (Portugal, batería e percusións), Moisés Fernandes (Portugal, trompeta) e Sérgio Tannus (Brasil, guitarra e cavaquinho).

Cantos na Maré é unha produción de Nordesía, co patrocinio do Concello de Pontevedra e a colaboración da Axencia Galega das Industrias Culturais (Agadic) e Novacaixgalicia. A nova edición presentárona esta mañá na Casa do Concello de Pontevedra a concelleira de Cultura da cidade, Anxos Riveiro, o director-xerente de Nordesía, Paco de Pin, e a directora artística, Uxía.

Anxos Riveiro destacou que “nos sentimos tremendamente orgullosos de Cantos na Maré, que non é só un concerto. Nesta edición a maxia volverá estar presente desde o primeiro momento”. Paco de Pin subliñou a importancia de Pontevedra neste festival. “Esta vila é o gran peirao de ribeira no que podemos construír esta nave que navega o Atlántico, dirixida por Uxía, esa gran alquimista que vai unindo culturas”.

Uxía admitiu que, chegados á novena edición, “é difícil seguir sorprendendo, pero imos tratar de facelo unha vez máis”. Cantos na Maré é para a cantante e directora artística do evento “unha aposta polo contacto, o intercambio, a fusión, a investigación das raíces comúns. É unha oportunidade para reflexionar sobre a nosa identidade”.

Entradas xa á venda

As entradas ao espectáculo están á venda desde hoxe a través do servizo de venda anticipada de Servinova (www.servinova.com e 902 504 500) a un prezo de 12 euros (gastos de xestión incluídos). Véndense por anticipado ata esgotar localidades. No despacho de billetes poderanse adquirir a 15 € o mesmo día do concerto, no Pazo da Cultura de 19:00h ao comezo do espectáculo.

Os artistas participantes

Carlos do Carmo é sinónimo de fado. Hai case medio século que iniciou unha carreira artística consagrada á canción de Lisboa, converténdose nunha das súas voces máis emblemáticas. A súa preocupación por evolucionar cos tempos fai que siga a ser un referente para as novas xeracións, que atopan nel o carisma, a elegancia e a frescura dun artista universal que levou a música portuguesa aos mellores escenarios dos cinco continentes.

Mayra Andrade pode presumir aos seus 26 anos de ter compartido aventuras musicais con Charles Aznavour, Youssou N'Dour, Carlinhos Brown, Angélique Kidjo ou Lenine. Non é unha cantante máis: é a voz chamada a marcar unha nova etapa na música de Cabo Verde. Inconformista e atrevida, foxe de etiquetas explorando as vías menos transitadas, coa convicción de que é necesario experimentar para crecer.

Socorro Lira xunta coñecemento do pasado e creatividade contemporánea. Vén do sertão brasileiro, ama as músicas do seu país e traballa arreo para divulgar as súas manifestacións máis xenuínas. Ao seu valioso traballo de recuperación do patrimonio musical do estado de Paraíba seguiu un proxecto ambicioso que a uniu para sempre a Galicia: é Cores do Atlántico, no que fai unha interpretación en clave actual das cantigas de amigo da lírica galego-portuguesa.

Xoán Curiel fai pop galego libre de prexuízos. As súas cancións agochan sorpresas agradables: instrumentacións cálidas, arranxos atrevidos, influencias da música étnica e letras conectadas co presente. Magnético Zen é o seu último álbum, no que ofrece a súa particular visión crítica do caos no que se atopa inmersa a sociedade actual. Unha sacudida necesaria para espantar o medo de enfrontarse ao presente.

POLICROMIA

A CHIA.mov

Xoán Curiel. Argumento Lento no Teatro Principal.mp4